Home Read Content

Haherutse kumurikwa inkusanyamagambo y’Igifaransa irimo inshinga ‘Techniquer’ yakomotse mu Rwanda.

User Image Kabera  Samson Shared publicly - Last 2 Month(s) ago

U Bufaransa ku bufatanye n’Umuryango uhuza ibihugu bikoresha Igifaransa, OIF n’abandi batangije inkusanyamagambo y’Igifaransa (Dictionnaire des francophones) ikubiyemo amagambo adasanzwe akoreshwa mu bihugu bikoresha Igifaransa.

Haherutse kumurikwa inkusanyamagambo y’Igifaransa irimo inshinga ‘Techniquer’ yakomotse mu Rwanda.

Mu magambo mashya yagaragaye harimo ‘Techniquer’ ryahimbiwe mu Rwanda aho rizwi nko gutekinika, gukoresha amanyanga kugira ngo ugire icyo ugeraho cyangwa se kwirwanaho ushaka ibisubizo by’ibibazo bikugarije.

Iri jambo ryatanzwe n’Umunyamabanga Mukuru wa OIF, Louise Mushikiwabo kuri uyu wa Kabiri ubwo yari yitabiriye umuhango wo gutaha iyo nkusanyamagambo iboneka kuri Internet ku rubuga rwa http://www.dictionnairedesfrancophones.org/  ndetse no kuri porogaramu za telefone nka Play store na Apple Store.

Minisitiri w’Umuco mu Bufaransa, Roselyne Bachelot yavuze ko iyo nkusanyamagambo izafasha mu gukomeza gukunguhaza ururimi rw’Igifaransa aho rukoreshwa hose ku isi, hahangwa amagambo mashya.

Yagize ati “Iyi nkusanyamagambo izafasha abakunzi b’ururimi rwacu ku isi basaga miliyoni 300 kwishimira ubukungu buruhishemo.”

Madamu Louise Mushikiwabo muri uwo muhango, yavuze ko hari ijambo ‘gutekinika’ rikoreshwa mu Rwanda naryo rikwiriye kwinjira muri iyo nkoranya rikitwa ‘Techniquer’.

Ukuriye Komite yashyizweho ishinzwe iyo nkoranya, Bernard Cerquiglini yahise avuga ko iryo jambo bararyongeramo.Ubusanzwe ijambo ’gutekinika’ ryavuye ku ijambo ’Technique’ risanzweho mu Gifaransa ariko nta nshinga ’Techniquer’ yari isanzwe mu Gifaransa.

Iyi inkoranya ibumbiye hamwe amagambo n’amuga bisaga ibihumbi 500 bikoreshwa mu bihugu bitandukanye bikoresha Igifaransa.

Harimo andi magambo akoreshwa mu bindi bice by’isi nka clavardage ikoreshwa muri Québec, eau à ressort, lancer un chameau (Repubulika Iharanira Demokarasi ya Congo) pause-carrière (u Bubiligi), avoir la bouche sucrée (Côte d’Ivoire) n’andi.

Mu mpera z’umwaka ushize, Perezida w’u Bufaransa Emmanuel Macron niwe wasabye ko iyo nkoranya ikorwa.