Home Read Content

Nyarugenge-Muhima: Polisi yafashe uwari ugiye kugurisha insinga za Internet yibye

User Image GATETE  MUHAMOUD 2 Shared publicly - Last 2 Month(s) ago

Ngizwenayo Alex w’imyaka 37 niwe wafatanwe insinga zikwirakwiza murandasi mu gihugu (Internet) binyuze mu muyoboro wa Fibre Optique. Yafatanwe insinga zifite uburebure bwa metero umunani(8), yafashwe mu rukerera rwa tariki ya 26 Mutarama 2020, afatirwa mu kagari ka Kabasengerezi mu murenge wa Muhima mu karere ka Nyarugenge.

Nyarugenge-Muhima: Polisi yafashe uwari ugiye kugurisha insinga za Internet yibye

Umuvugizi wa Polisi mu mujyi wa Kigali, Chief Inspector of Police (CIP) Marie-Gorette Umutesi yavuze ko Ngizwenayo yafashwe ubwo abapolisi ndetse n’izindi nzego z’umutekano bari mu kazi.

Yagize ati:  “Hari mu rukerera abapolisi barimo gucunga umutekano bahura n’uriya Ngizwenayo Alex afite insinga zikwirirakwiza murandasi binyuze mu muyoboro wa Fibre Optique niko kumufata.”

Ngizwenayo akimara gufatwa yavuze ko ari umuntu uzimuhaye ngo ajye kuzimugurishiriza, uyu nawe arimo gushakishwa. Ni mugihe Ngizwenayo yahise ashyikirizwa urwego rw’igihugu rw’ubugenzacyaha(RIB) ikorera kuri sitasiyo ya Polisi ya Muhima kugira ngo hakorwe iperereza.

CIP Umutesi yaboneyeho kongera gushishikariza abaturarwanda kwirinda kwangiza ibikorwaremezo leta ibagezaho ndetse babona ubyangiza bakihutira gutanga amakuru.

Ati: “Abaturage icyo duhora tubakangurira ni ugufata neza ibikorwaremezo leta ibagezaho, uriya wangije insinga zikwirakwiza murandasi (Internet) arimo guhemukira abantu benshi kandi nawe atiretse. Ntawe uyobewe akamaro ka murandasi mu iterambere ry’igihugu kandi nawe iryo terambere rimugirira akamaro.”

Umuvugizi wa Polisi mu mujyi wa Kigali yakomeje akangurira abantu kwitondera insinga aho ziri mu gihugu kuko uretse no kwangiza ibikorwaremezo bashobora gufatwa n’umuriro bakahasiga ubuzima. Inzego z’umutekano zirimo gushakisha uwo Ngizwenayo avuga ko bari bafatanyije kugurisha ziriya nsinga.

Itegeko Nº68/2018 ryo ku wa 30/08/2018 rivuga igihano ku cyaha cyo kwiba mu ngingo yaryo ya 166 ivuga ko umuntu wese uhamijwe n’urukiko icyaha cyo kwiba, ahanishwa igifungo kitari munsi y’umwaka umwe (1) ariko kitarenze imyaka ibiri (2) ,ihazabu y’amafaranga y’u Rwanda atari munsi ya miliyoni imwe (1.000.000 FRW) ariko atarenze miliyoni ebyiri (2.000.000 FRW), imirimo y’inyungu rusange mu gihe cy’amezi atandatu (6) cyangwa kimwe gusa muri ibyo bihano.


0