Home Read Content

Rubavu: Polisi yatahuye uwagerageje guhisha ibiro 155 bya Koluta ahaterekwa moteri mu modoka

User Image GATETE  MUHAMOUD 2 Shared publicly - Last 8 Month(s) ago

Muri iki cyumweru dusoza, ishami rya Polisi rishinzwe kurwanya magendu (RPU) ku bufatanye n’irindi shami rya Polisi rishinzwe umutekano ku mipaka (BSU) bafatiye mu karere ka Rubavu mu murenge wa Gisenyi ahazwi nko kuri Grande barrière umugabo w’umunyekongo apakiye mu kizuru k’imodoka amabuye y’agaciro ya magendu yo mu bwoko bwa Koluta.

Rubavu: Polisi yatahuye uwagerageje guhisha ibiro 155 bya Koluta ahaterekwa moteri mu modoka

Uyu mugabo witwa Bahati Maombi w’imyaka 40 akaba amaze imyaka itatu atuye mu Rwanda mu karere ka Rubavu.  Yafatanwe ibiro 155 yo mu bwoko bwa Koluta y'umweru, akaba yari ayatwaye mu modoka ifite icyapa kiyiranga CGO 2885AF/19 yayashyize mu dufuka tune kugira ngo abone uko ayatwara.

Umuvugizi wa Polisi mu ntara y’Iburengerazuba, Chief Inspector of Police (CIP) Bonaventure Twizere Karekezi yavuze ko iyi modoka yafatiwe ku mupaka w'u Rwanda na Repubuka iharanira Demokarasi ya Congo ku mugoroba ahagana saa mbiri z'ijoro. Yafashwe  ku bufatanye bw’aba bapolisi bakorera kuri uyu mupaka nyuma yo kugirira amakenga iyi modoka bakayihagarika.

Yagize ati: “Ubu hari amayeri abatwara magendu mu modoka cyane cyane inshya basigaye bakoresha ugasanga imodoka munsi bayometseho ikindi cyuma kugira ngo babone aho bapakira magendu.  Iyi modoka ya Maombi yageze kuri abo bapolisi bayigirira amakenga kuko babonaga ingano yayo yiyongereye niko kumuhagarika barayisaka barimo bayisaka atangira no gutitira nyuma nibwo baje gusanga ayo mabuye yayapakiye mu kizuru ahasanzwe haba moteri.”

CIP Karekezi akomeza avuga ko Bahati Maombi yemereye abapolisi ko ayo mabuye ari magendu yahawe n’umuturage w' i Goma amusabye kuyamujyanira iwe mu karere ka Rubavu.

Umuvugizi wa Polisi mu ntara y'Iburengerazuba yaburiye abagifite umutima wo kurangura no gucuruza magendu ko bakwiye kubicikaho kuko amayeri n’uburyo bwose bakoresha batazabura gutahurwa.

Ati: “Abakishora muri ubu bucuruzi bibwira ko bahimbye amayeri mashya ngo ntibafatwa baribeshya kuko uburyo bwose batwaramo magendu  cyangwa bayicuruzamo, Polisi n’abafatanyabikorwa bayo bari maso. Aba basudiye imodoka bibwiraga ko batazatahurwa ndetse n’abandi bose bagiye bahimba amayeri anyuranye barafashwe. Niyo mpamvu tuboneyeho kongera gukangurira n’undi wese ugifite umugambi wo kubyishoramo kubicikaho kuko uretse kuba babihanirwa n’amategeko bibatera igihombo.”

Yibukije abaturage muri rusange kujya bihutira gutanga amakuru y’aho babonye magendu kuko igira ingaruka ku muryango nyarwanda, aho usanga imisoro iba inyerejwe kuri ibyo bicuruzwa ariyo yubaka igihugu.

Aya mabuye n’imodoka byashyikirijwe ishami rya Polisi rishinzwe kurwanya magendu (RPU) n’aho Bahati Maombi ashyikirizwa urwego rw’igihugu rw’ubugenzacyaha RIB ikorera kuri sitasiyo ya Gisenyi.

Ingingo ya 54 mu itegeko no 58 ryo ku wa 13/08/2018 rigenga ubucukuzi bw’amabuye y’agaciro na kariyeri rivuga ko:  Gukora ibikorwa by’ubucukuzi bw’amabuye y’agaciro cyangwa kariyeri nta ruhushya umuntu wese ushakashaka, ucukura, utunganya, ucuruza amabuye y’agaciro cyangwa kariyeri nta ruhushya, aba akoze icyaha.

Iyo abihamijwe n’urukiko, ahanishwa igifungo kitari munsi y’amezi abiri (2) ariko kitarenze amezi atandatu (6) n’ihazabu y’amafaranga y’u Rwanda atari munsi ya miliyoni imwe (1.000.000 FRW) ariko atarenze miliyoni eshanu (5.000.000 FRW) cyangwa kimwe gusa muri ibyo bihano. Urukiko rutegeka kandi ubunyagwe bw’amabuye y’agaciro cyangwa kariyeri byafatiriwe biri mu bubiko, bicuruzwa cyangwa bitunganywa nta ruhushya.

0