Home Read Content

Gatsibo: Umumotari yafashwe atwaye ikiyobyabwenge cya kanyanga

User Image GATETE  MUHAMOUD 2 Shared publicly - Last 2 Month(s) ago

Polisi y’u Rwanda ikorera mu karere ka Gatsibo mu murenge wa Gatsibo, kuri uyu wa Kane tariki ya 12 Ukuboza yafashe umumotari witwa Uwimbabazi Hosian w’imyaka 23. Uyu mumotari yafashwe atwaye kanyanga litiro 30 kuri moto ye ifite icyapa RD 976V ayikuye mu murenge wa Ngarama ari naho avuka akanahakorera, ayijyanye mu murenge wa Gatsibo.

Gatsibo: Umumotari yafashwe atwaye ikiyobyabwenge cya kanyanga

Umuvugizi wa Polisi mu Ntara y’Iburasirazuba, Chief Inspector of Police (CIP) Hamdun Twizeyimana avuga ko uyu mumotari gufatwa kwe byaturutse ku makuru yatanzwe n’abaturage.

Yagize ati: “Abaturage bahaye amakuru Polisi ko hari abamotari bajya batwara ikiyobwange cya kanyanga bagikuye mu mu murenge wa Ngarama wo mu karere ka Gatsibo bakijyana mu murenge wa Gatsibo, Abapolisi bakimara kumenya aya makuru niko guhita bategura igikorwa cyo gufata abo bazitwara.”

CIP Twizeyimana avuga ko muri uwo mukwabu bafatiyemo uyu mumotari Uwimbabazi Hosian ahetse izo kanyanga mu gikapu ziri mu mashashi.

CIP Twizeyimana yaboneyeho gukangurira  abakora umwuga wo gutwara abagenzi kuri moto ndetse n'abanyarwanda muri kwirinda icyaha cyo kwijandika no gukwirakwiza ibiyobyabwenge mu buryo ubwo aribwo bwose.

Yagize ati:   “Polisi ihora ikangurira abamotari n’abanyarwanda muri rusange kwirinda kwijandika mu ikoreshwa  ry’ibiyobyabwenge."

Umuvugizi wa Polisi muri iyi Ntara yakanguriye abakora umwuga wo gutwara abagenzi kuri moto kugira uruhare mu kurwanya no gukumira ibyaha bitandukanye by’umwihariko ibiyobyabwenge kuko byangiza ubuzima bw’ababikoresha bikanateza umutekano mucye mu gihugu.

Yanashimiye ubufatanye n’abaturage mu gukumira ibyaha bitandukanye, abasaba gukomeza gukorana na Polisi batangira amakuru ku gihe y’abakora ibyaha bitandukanye.

Uyu mumotari yashyikirijwe urwego rw’igihugu rw’ubugenzacyaha(RIB) rukorera kuri sitasiyo ya Gatsibo kugira ngo akurikiranwe ku cyaha acyekwaho.

Itegeko nº68/2018 ryo ku wa 30/08/2018 riteganya ibyaha n’ibihano muri rusange, ingingo ya 263 ivuga ko umuntu wese ukora, uhinga, uhindura, utunda, ubika, uha undi, ugurisha mu gihugu ibiyobyabwenge cyangwa urusobe rw’imiti ikoreshwa nka byo mu buryo bunyuranije n’amategeko, aba akoze icyaha.  Iyo abihamijwe n’urukiko ahanishwa igifungo kitari munsi y’imyaka makumyabiri (20) ariko kitarenze imyaka makumyabiri n’itanu (25) n’ihazabu y’amafaranga y’u Rwanda atari munsi ya miliyoni cumi n’eshanu (15.000.000 FRW) ariko atarenze mililiyoni makumyabiri (20.000.000 FRW) kubyerekeye ibiyobyabwenge bikomeye.

0