Nyanza: Babiri batawe muri yombi mu ijoro batema ishyamba rya Leta

Minani Jean Bosco w’imyaka 37 na Kabuye Casimile ufite imyaka 43 nibo bafashwe barimo gutema ishyamba rya leta riherereye mu karere ka Nyanza mu murenge wa Ntyazo.

Umuyobozi wa Polisi mu karere ka Nyanza Superintendent of Police (SP) Mberabagabo Kamali, yavuze  ko  aba  bagabo bafashwe  mu ijoro rya tariki 09 Nyakanga 2019,  bamaze gutema  ibiti 32 mu ishyamba rya leta rizwi ku izina rya Byabusunzu bakabijyanira uyu Minani Jean Bosco aho arimo kubaka inzu ye. Amakuru akaba yaraturutse ku baturage bari bamaze iminsi babona abantu badafite amashyamba batunda ibiti rwihishwa.

Yagize ati:” Ubusanzwe Minani yahaga akazi uriya Kabuye akajya gutema ibiti akabimuzanira iwe aho arimo kubaka hafi ya ririya shyamba rya leta. Kubera imikoranire myiza iri hagati yacu n’abaturage, bamaze gusobanukirwa akamaro ko gukumira ibyaha bitaraba. Abaturage baduhaye amakuru dufata Kabuye ari nijoro avuye kubitema atwereka aho abivana n’aho aba abijyanye bahita bafatwa.”

SP Mberabagabo yaboneyeho gukangurira abanyarwanda kwirinda kwangiza amashyamba ya leta ndetse n’ibidukikije muri rusange kuko bigira ingaruka k’ubuzima bwa muntu mu gihe cya vuba cyangwa mu gihe kirambye.

Ati:”Ntawe uyobewe ko amashyamba akurura imvura, ririya shyamba rya leta riri hafi y’ahantu leta irimo gutuza abaturage, nibamara kuhagira ubutayu bizabagiraho ibibazo bikomeye.”

SP Mberabagabo yakomeje asaba abanyarwanda kudahishira abantu bangiza ibidukikije harimo n’amashyamba kugira ngo bakurikiranwe babihanirwe.

Yibukije abaturage ko nta muntu wemerewe gutema igiti mu ishyamba kabone n’iyo ryaba ari ishyamba rye yitereye.

Ati:”Gutema amashyamba bigira amategeko abigenga, ubanza gusaba uruhushya abayobozi mu nzego z’ibanze n’ushinzwe amashyamba agasuzuma ko ishyamba ryeze k’uburyo ryasarurwa kandi wamara kuritema ugahita utera ibindi bibisimbura.”

Abafashwe Minani Jean Bosco na Kabuye Casimir bashyikirijwe Urwego rw’Ubugenzacyaha (RIB) kugira ngo bakurikiranwe ku cyaha bakoze.

Jessica

info1hanga@gmail.com

hanga.rw

0

0 comment(s) Tanga igitekerezo

Note : Sorry No comment available now...

Tanga Igitekerezo

Author
GATETE
Admin

GATETE MUHAMOUD 2

You May Also Like